I Gildesalen er det plass for små og store hendingar, middagar, kurs eller konsertar, bryllaup og store dagar.
Konstruksjonen i denne salen er sperrebind med kjerneved av furu frå Målsnes, skore på den lokale saga i Kvamsøy. Detaljar på trearbeidet er utført av Åge.
I salen har vi ein del møblar av Ivar Høyvik, treskjerar og bestefar til Eli-Grete. Veveteppe av Astrid Geithus, dotter av Eli og Ivar Høyvik. Astrid Wittersø har laga glasmosaikken på eine brystveggen.

Dette er staden for prøvesmaking av ulike typar cider, dessertvinar eller eit lite glas Epledram, Plommedram eller Sogn Eple Aquavit. Åge og Gard formidlar gjerne om prosessen frå eplet i hagen til dram på Vinmonopolet.
I kjellaren står tankane med cider under gjæring. Her står destilleriet av blank kopar og her står eikeflakar fulle av flasker som skal bli til Aldin musserande eplecider. Her lagrer vi frukt og bær på glas, krukker og flasker – til glede for gjestene våre resten av året.

Glashuset er ein overbygd terrasse/vinterhage med opne vindauge mot hagen og Sognefjorden. Her er det ikkje lov å kaste stein, det skjønar de sikkert!
Sommarrestauranten held til her og har plass til opp mot 100 gjester. Glashuset eignar seg også godt til mottaking ved store selskap.
Om våren er dette staden for små planter som skal bli urter og blomar i hagen utover sommaren.

Dette rommet har grue og vedfyrt bakaromn. Her er det lange bakedager der flettebrød, surdeigsbrød og foccacia blir steikte i den vedfyrte bakaromnen. Eller vi har bakekurs og samlast rundt bordet til eit velfortent måltid etterpå.
Dette kan vere staden for ei mottaking med fyr på grua eller selskap opp til 30 personar når det er hustrete og kaldt ute.
Du kan lytte til eit eventyr eller få ny kunnskap om fruktdyrking. Kvifor vil ikkje dei fem kjernane i eit eple gi same eplesort når dei veks opp

Gard sin første jobb som gutunge var å stelle hønene, sanke egg og halde det triveleg i hønsehuset. Han vart ein dyktig eggseljar før han la den karriereren på hylla. Vi andre saknar å gå i hønsehuset og hente ferske egg!
No er Hønsehuset eit hus der planlegginga av dei neste internasjonale ungdomsprosjekta finn stad.

Den økologiske frukthagen gir mange gleder … og mykje arbeid. Om våren skal  ca 2 tusen tre skjerast slik at sol og lys slepper inn og kan gi søte og smakfulle frukter. Så må heile familien vera med i våronna og ''dragsa sprek'' til bålet. 
Så kjem bløminga - dette årlege underet, der ein kan vandra gjennom hagen til angen av noko midt mellom nyvaska laken på ei klessnor og eit parfymeri!
Om biene og humlene har gjort jobben sin, startar plommehausten ca 20. august.